فوضى هون .. وهون
طاولة وفنجان قهوة
وكتب ومجلات
وعلبة دخان
وين المنفضة يمكن تحت شي كتاب
ما مبين شي غير عوينات مرمي ع الأرض
وقلم رصاص بأيدي عم فكر شو أكتب
كل الي ببالي قصص وحكايات
وذكريات مشوشي
وشاشة اللاب توب بتضوي بوشي
بالغرفة في لمسة حياة
بس ملياني فوضى
والموسيقى هاي كم مرة سمعتها
مليون مرة يمكن
وكل مرة بتاخدني لنفس المكان
الي بدي اهرب منو
ليش عم عذب حالي ما بعرف
ايه يا صاحبي يمكن هيك لما تصير
النهاية بنصير نهوى العذاب
ع أساس انو كنا مرتاحين قبل
هههههههه بس شو ما كان
أحسن من هلى ومن الي عم بصير
شو هالفوضى هاي ياربي
هي براسي أو عنجد أنا عايشي فيها
ما بعرف يمكن
دخلك الي بينا بعدو أو شو ؟
حاسي أنو في شي غلط عم بصير
شو هوي ما بعرفو
بس أنا عندي أحساس يخرب بيتو
نادر ما بخيب
بتعرف يا صاحبي
هيدا الأحساس الي بتحس فيي لما تشوف
حدا بتحبو كتير وحتى وهوي بعيد بتحس فيي
وبتعرف اذا كان بخير او لاء
اي هيدا أنا عم عيشو وبعرف منيح
أنو كل شي بخير وتمام
إلآ أنا مش بخير أبداً
شفت كيف الفوضى عم تعمل براسي
خليني أسكت أحسن ما أحكي شي
بعدين بندم عليه وخود بقى شو يخلصني من ندمي
وأمرك لربك صاحبي مجبور تتحملني
وتتحمل هيك خربشات مني وهيك فوضى
ما أنت بتعرف منيح أني أحيانا
بصير خارج السيطرة
دايما بضل فيي هيدا التمرد الي بحاول
أني ما بينو بس لازم كل فترة يطلع معي
وبكل أسف ما في غيرك يتحملني
ليست هناك تعليقات:
إرسال تعليق